Shtohen barnat e rimbursueshme

26 barna me rimbursim më shumë se vitin e shkuar do të përfitojnë qytetarët këtë vit. Medikamentet e reja i përkasin kryesisht sëmundjeve si hipertensioni, dializa, diabeti. Një citostatik i shtrenjtë, por tepër i nevojshëm për personat me leuçemi e një tjetër për ato me kancer prostatë. Për herë të parë Ministria e Shëndetësisë propozon futjen në listën me rimbursim edhe të një ilaçi për kancerin e gjirit dhe një medikament për përdoruesit e drogës e që njëkohësisht përdoret për qetësimin e dhimbjeve të forta.
Lista e Ministrisë së Shëndetësisë ka kaluar në Institutin e Sigurimeve të Kujdesit Shëndetësor pas miratimit të të cilit duhet të marrë edhe atë të Këshillit të Ministrave. Fondi i barnave me rimbursim pritet të kap një vlerë prej 8.3 miliardë lekë nga 6.9 miliardë që ka qenë një vit më parë kur lista ofronte 420 medikamente.