Skitë shqiptare përfundojnë Ses Cup

Ses Cup, apo kampionati i vendeve në zhvillim, që për katër ditë është zhvilluar në Kronoplatz të Italisë nën organizimin e Federatës Shqiptare të Skive, të martën është mbyllur zyrtarisht. Sllallomi gjigant ishte në marshin e dytë, ndërsa për femra vendin e parë e zuri izraelitja Noa Zolos me 2’35”37. Në vendin e dytë francezja Tea Lamborai me 2’35”63 dhe në të tretin japonezja Miho Mizutani me 2’35”74. Kiara Di Kamilo si e vetmja përfaqësuese e Shqipërisë zuri vendin e 35-të.

Për meshkuj fitues u shpall italiani Federiko Liberatore me 2’29”35. Në të dytin izraeliti Barnabas Zolos me 2’30”02 dhe në të tretin italiani Manuel Ploner. Erion Tola ishte i 37-ti, Deni Xhepa i 40-ti dhe Kevin Qerimi i 44-ti. Marsel Biçoku ishte i 67-ti në rrëshqitjen e parë me 1’32”38, por më pas nuk mori pjesë në të dytën, ndërsa Ezio Leoneti dhe Vasil Veriga nuk e përfunduan garën. Përgjithësish një organizim perfekt i Federatës Shqiptare të Skive, teksa kështu u përmbyll një aktivitet katërditor në alpet e Italisë, ku morën pjesë mbi 200 sportistë nga gati 35 shtete të botës.