Sot “Nata e Bardhë” në Tiranë, aktivitet nisin me ndezjen e dritave të pemës së vitit të ri

Kryebashkiaku Erion Veliaj ka pritur në takim artistët të cilët do të performojnë në koncertin festiv të ndezjes së dritave në kryeqytet.

“Jemi  këtu me çunat e gocat më të paparë të qytetit, artistët më magjikë të Tiranës sonë, me të cilët në orën 18.00, sot pasdite do të hapim dritat e pemës së Vitit të Ri, për gjithë gëzimin që sjell kjo stinë festash. Ndërkohë gjatë gjithë natës, do kemi një Natë të Bardhë,  ku do të fillojmë me hapjen e dritave, do të vazhdojmë deri në të gdhirë”, u shpreh kryebashkiaku.

E pranishme në takimin me kryebashkiakun ishte edhe artistja e njohur Manjola Nallbani e cila u shpreh se sot Tirana është e të gjithëve.

“Sonte në shesh do festojmë, do festojmë me muzikë të bukur, me artistë të mrekullueshëm, do festojmë me publikun i cili nuk është vetëm tirons, por me siguri nga të gjithë rrethet e Shqipërisë, sepse Tirana është e të gjithëve.

E dua me gjithë shpirt dhe ju ftoj të vini e të kënaqemi. Është shumë e rëndësishme të  kemi sa më shumë arsye për të festuar e gëzuar me njeri-tjetrin! Gëzuar festat”, tha artistja.

Festimet për “Natën e Bardhë”, tashmë e kthyer në një traditë,  do të nisin në orën 18:00 të mbrëmjes, për të vijuar deri në orët e para të mëngjesit./vizionplus.tv