Spahiu: Në partinë tonë do jetë Myslim Pashaj, Pëllumb Xhufi, Gjergj Bojaxhi

Drejtuesi i Aleancës Kuq e Zi, Kreshnik Spahiu, duke folur në emisionin Top Story, tha se sulmet ndaj tij kanë nisur kur dy partitë e mëdha kanë parë sondazhet për forcën e re politike. Spahiu tha se në partinë e tij do jenë anëtarë Myslim Pashaj, Pëllumb Xhufi e Gjergj Bojaxhi. Ai shtoi se qeveria ka kontrollin mbi gjykatësit, pasi ka e vetme fuqinë e shkarkimit të tyre dhe këto shkarkime i bën në mënyrë selektive. Spahiu tha se në qendër të propozimeve të tyre janë zgjedhja e anëtarëve të gjykatave të larta nga populli si dhe futja e jurisë në dhënien e vendimeve në gjyqe. Spahiu shtoi se ka një bum anëtarësimesh në forcën e tij me 1400 anëtarësime në ditë në Durrës.

Shndërrimi i AK-së në parti politike

Në nisje të emisionit, ishte e natyrshme që lideri i Aleancës Kuq e Zi, Kreshnik Spahiu, të përgjigjej për shndërrimin e lëvizjes në një parti politike dhe vendin ku kjo u komunikua, nga Uashingtoni. U zgjodh koha dhe vendi i duhur për ta bërë këtë, u shpreh Spahiu. Kisha deklaruar kohë më parë se nëse do të vendosja që AK të bëhej parti, do të braktisja pozicionin shtetëror që kisha dhe ishin një sërë ngjarjesh zinxhir që ndodhën. Një javë më parë dhashë dorëheqjen dhe natyrisht, vizita përkonte edhe me pavarësinë e Kosovës, 17 shkurtin. Nga ajo ditë, kemi nisur një sërë takimesh konsultative, për të prezantuar programin tonë, që do të prezantohet në maj dhe do të mbledhë delegatë nga çdo qytet shqiptar, brenda e jashtë kufijve. AK kërkon të pastrojë këtë skenë të politikës nga një ujë i ndotur dhe nga partitë që janë shndërruar në parti private, që drejtohen nga të njëjtët njerëz prej kohësh.

Spahiu: Sistemi i drejtësisë është i kapur

I përballur me kritikat për rolin e tij në degradimin e sistemit të drejtësisë në tre vitet e fundit, ish nënkryetari i KLD-së u përgjigj: Sistemi i drejtësisë, nuk po pastron dot politikën nga figurat e inkriminuara, për faktin se vjen nga një sistem që ishte parti shtet, ku diktatura kontrollonte gjithçka. Demokratët sot e dje socialistët kontrollojnë të gjithë drejtësinë, që është e kapur, e kontrolluar nga politika. Jo rastësisht, në 20 vjet nuk është dënuar asnjë politikan. E dyta, për tre vjet, sistemi i drejtësisë ka qenë viktimë e bojkotit të parlamentit, asnjë ligj, asnjë kod nuk është miratuar dhe të gjitha buxhetet e institucioneve janë reduktuar dhe vijmë tek thënia e Falkones: Më shkurtuan buxhetin, makinat, nuk më favorizojnë me legjislacion, më ulën sigurinë, pra më thoni kush është më e rrezikshme në këtë shtet, shteti apo mafia?.

Në vijim të emisionit, Spahiu foli edhe për vizionin e tij për të ardhmen e drejtësisë. Duhet një reformë me rrënjë dhe kjo është një prej dhjetë pikave të kontratës sonë, kontratë që nuk ka asnjë pikë të përbashkët me programet e Partive Demokratike dhe Socialiste. Disa nga idetë për përmirësimin e situatës është përfshirja e jurive apo përzgjedhja e gjykatësve nga vetë populli. Gjyqtarët shkarkohen nga KLD me propozim të qeverisë. Çdo propozim i saj për të shkarkuar gjyqtarët është pranuar. Por disa herë këto propozime kanë qenë selektive.

Momenti i dorëheqjes

Përse nuk e dhashë dy muaj më parë? Po ti bëja të gjitha akuzat dhe çështjet që kam mbrojtur pas dorëheqjes, sdo më besonte njeri Pjesa e krenarisë sime më detyroi të ngrija zërin që kur isha në detyrë. Pse dhënia e dorëheqjes, që mund ta jepja 6-7 muaj më parë, u dha tani? Kjo është një pikë për të cilën mirëpres shumë mendime dhe vlerësime, por e vërteta është kjo që thashë. Si nënkryetar i KLD-së, jam krenar që kam denoncuar të gjitha planet apo vendimmarrjet që kanë qenë në dëm të integritetit, sovranitetit dhe identitetit kombëtar. Provën dhe vulën e madhe e vuri Gjykata Kushtetuese, që ndau faqezinjtë nga kuqezinjtë. Çkuptim do të kishte të denoncoja ligjin që cenonte identitetin kombëtar, që shndërronte me mijëra shqiptarë në grekë, pasi të jepja dorëheqjen dhe jo atëherë kur kisha fuqi për ta ndryshuar dhe denoncuar këtë situatë?.

Akuza për kombësinë e Spahiut

Në një intervistë për gazetën Shqip, deputeti Enkelejd Alibeaj, njëkohësisht kreu i komisionit hetimor për veprimtarinë e KLD-së dhe Spahiut, hidhte dyshime për vetë prejardhjen e kreut të AK-së. Në Top-Story, Spahiu u përgjigj me agresivitet ndaj këtyre akuzave. Sipas kryeministrit Berisha dhe zëdhënësit të tij Ali-Beu, pasi gërmuan e gërmuan e nuk gjetën gjë, dilka që unë qenkam i huaj e i dërguar nga ndonjë fuqi këtu. Janë ata kanë bërë diçka unikale, duke i vënë emrin e komisionit tim si komisioni për shkarkim dhe jo për hetim. Në fillim hetuan se çfarë udhëtimesh kam bërë unë, pastaj se çfarë udhëtimesh kam bërë në katër vjet e gjithçka tjetër. Deklaruan se Kreshnik Spahiu në rrënjët e tij 3-mijë vjeçare nuk është shqiptar. Këtë akuzë e bëjnë ata që e shesin Shqipërinë si plaçkë tregu. Fatkeqësisht, ndodh shpesh në Shqipëri që kur humbet argumenti politik, kalohet në akuza personale. Unë kam një prejardhje thellësisht etnike shqiptare, babai nga Prizreni dhe ka ardhur në Tiranë për shkak të diskriminimit. Ndërsa nëna vjen nga familjet Ismailati e Bejleri të Libohovës, që u janë mohuar shumë të drejta në Greqi për punë pronash, etj..

Largimi im, mesazh për gjyqtarët e tjerë

Duke argumentuar për momentin politik kur u zgjodh kërkimi i shkarkimit të Spahiut, ai argumentoi: Kryeministri Berisha kërkoi ngritjen e komisionit shkarkimor në 16 janar, në të njëjtën ditë e minutë, kur duhet të jepej vendimi për Ilir Metën, në të njëjtën ditë kur vinte ekspertiza e FBI-së që lidhet me 21 janarin. Edhe nëse analisti më pro qeverisë thotë që këto janë rastësi, unë tërhiqem. Nëse ka një njeri miop që mendon se shkarkimi i Spahiut ska ardhur sepse ishte ferrë nëpër këmbë, që shkarkimi i tij ishte një mesazh për çdo gjyqtar, atëherë ai është me të vërtetë miop.