Stefanoviç: Tani fillon vështirësia në dialogun politik me Kosovën
Faza e parë e dialogut të Beogradit e Prishtinë ka përfunduar me arritjen e shtatë marrëveshjeve që rregullojnë fusha të rëndësishme të jetës së qytetarëve e pas formimit të Qeverisë së re të Serbisë hapet faza e dytë, nga e cila varet fillimi i negociatave për anëtarësim në BE ajo do të verë në tryezë temat më të komplikuara, që nga energjia elektrike e telekomunikacioni deri te iniciativa e kryetarit të Serbisë për zgjidhjen e çështjes së Kosovës. Në prag të njëvjetorit të fillimit të dialogut Kosovë Serbi, kështu i ka përmbledhur shefi i ekipit të Beogradit përpjekjet e ekipit të tij në negociata me shqiptarët, për të rregulluar, siç ka thënë ai çështje të jetës së qytetarëve pa e prekur statusin.
Stefanoviç ka thënë se është i kënaqur me arritjet dhe shton se ka qenë vendim i mençur ulja në tavolinën e bisedimeve me Prishtinën përkundër dallimit të madh dhe esencial të të dy palëve.
Është e sigurt ka thënë ai se edhe pse me raundet e deritanishme maratonike janë zgjidhur e hapur shumë çështje të dhembshme bisedimet që do të vazhdojnë do të ballafaqohen me fazën më të komplikuar të këtij dialogu .
Do të ballafaqohet edhe me mundësinë që dialogu të shndërrohet në dialog politik me të cilin përfundimisht do të rregullohen marrëdhëniet e Beogradit e të Prishtinës duke, siç ka thënë ai, respektuar interesat kombëtarë, Kushtetutën dhe ligjet e Serbisë
"Pas zgjedhjeve qeveria e re do të shikojë nga dhe në ç`formë do të shkojë dialogu. Pres që bisedimet ë të vazhdojnë për telekomunikacionin dhe energjinë elektrike por edhe për gjërat që janë shumë të rëndësishme për ne siç janë kthimi i shpërngulurve, kthimi i pasurisë dhe i të zhdukurve”, ka thënë Stefanoviq.
Këto ka thënë ai, janë edhe pjesë e planit katër pikësh të kryetarit Tadiç, të cilin ai e ka quajtur të mirëseardhur.
Problemet më të mëdha gjenden në këto katër fusha ka thënë ai dhe ka shtuar se me to rregullohen marrëdhëniet me Kosovën pa e rrezikuar interesin kombëtar, Kushtetutën dhe Rezolutën 1244.
Stefanoviç ka saktësuar se për energjinë dhe telekomunikacionin Beograd po përpiqet të sigurojë dhe ta rregullojë mbetjen e “Elektroprivredes” së Serbisë dhe të Telekomit të Serbisë në Kosovë, ta ketë në dispozicion pasurinë e këtyre ndërmarrjeve dhe të mundësojë funksionimin tyre në jug të Ibrit, ndërsa Prishtina përpiqet të largojë çdo prani të çfarëdo ndërmarrjeje publike të Serbisë nga ky territor.