Svoboda: Para BE-së, Serbia të zgjidhë problemet me Kosovën

Eurodeputeti dhe kryetari i Grupit të Social-Demokratëve në Parlamentin Evropian, Hanes Svoboda, i bëri thirrje Beogradit të ndryshojë qëndrimin ndaj Kosovës dhe të tregojë më shumë përkushtim në zgjidhjen e problemeve me palën kosovare. E ardhmja e të dyja vendeve dhe e rajonit në tërësi, sipas tij, do të jetë integrimi në Bashkimin Evropian, proces i cili, siç tha ai, nuk do të mund të finalizohet nëse Prishtina e Beogradi nuk i përmirësojnë raportet ndërmjet vete, e nëse vendet e rajonit nuk i përmbushin kriteret e nevojshme.
“Serbia duhet t`i zgjidhë problemet me Kosovën para se të anëtarësohet në Bashkimin Evropian, tha eurodeputeti dhe kryetari i Grupit të Social-Demokratëve në Parlamentin Evropian, Hanes Svoboda.
Në një debat me temën “Evropa mes teje dhe meje”, i cili u mbajt të shtunën në Prishtinë, Svoboda tha se zgjidhjet për shumë probleme që shteti serb ka me Kosovën, mund të gjenden në kuadër të dialogut aktual ndërmjet palëve.