"Talentet shqiptare, po bëjnë emër edhe jashtë atdheut"

Kryeministri Sali Berisha priti sot në një takim dy artiste shqiptare në Hollywood, Greta Zenelaj dhe Vilma Zenelaj.

Këto dy artiste ishin pjesëmarrëse dhe u prezantuan në Festivalin Ndërkombëtar të Filmit, që u zhvillua pak ditë më parë në qytetin e Durrësit, me dy produksione të tyre, komedinë “Çfarë të bëj unë tani?” dhe me melodramën “Në pyll”.

Gjatë takimit ato e njohën Kryeministrin me projektin e tyre të ardhshëm për realizimin e një filmi me tematikë për 2 prillin e vitit 1991. Ky film do të mbajë titullin “Shqipe” ose “Eagle”.

Gjatë qëndrimit në Shqipëri ato kanë vizituar edhe qytetin e Shkodrës, prej nga do të nisin xhirimet e filmit të tyre të ardhshëm.

Ato i shprehën Kryeministrit Berisha impresionet për ndryshimet tepër pozitive dhe të dukshme që ka pësuar qyteti i Shkodrës dhe Shqipëria në këto vitet e fundit.

Kryeministri Berisha i përgëzoi dy artistet shqiptare si për dy filmat me të cilat u prezantuan në Festivalin Ndërkombëtar të Filmit, ashtu edhe për iniciativën për realizimin e filmit të tyre të ardhshëm mbi ngjarjet e 2 prillit 1991.

Duke i uruar suksese në realizimin e këtij projekti, Kryeministri Berisha u shpreh se ndjehej mirë që artistët e rinj shqiptar, të cilët po bëjnë emër edhe jashtë atdheut, me talentin e tyre janë prezent në vendlindje. /abcnews/