Të kisha thënë të mos ia hapje derën askujt. Do marr hak për birin tim

Shqiptarët po gdhihen e po ngrysen me krime që po na shokojnë. Dje në mendjen e tyre ka mbetur një e moshuar, që shkulte flokët e vajtonte pasi i kishin ekzekutuar të birin e paralizuar brenda në banesë, ndërkohë që duhej të ruhej nga policia. Edhe i shoqi vdiq nga trauma.

Ishte nëna e Gentian Beqirit, të riut nga Elbasani, ekzekutuar dje në banesë nga dy persona, ndërkohë që duhej të ruhej nga policia. Nëna e tij, Hajrie Beqiri, sapo kishte dalë për të kthyer pazarin, por kur u kthye gjeti të birin të vdekur dhe të shoqin thuajse pa jetë. Atëherë nisi të mallkojë policinë, por edhe të shoqin, të cilin e kishte porositur të mos ia hapte derën askujt.

E lashë në gjumë djalin. Dola të blej bukë e të bëj pazaret e drekës. Kush ma ka vrarë djalin tim, do të marr hak se djali im nuk është vrasës. Neziri im e hapi derën, e ka fajin ai që mu vra djali. Kisha më shumë se një vit që e mbaja djalin me paketa, me bukë, nuk ikja në asnjë vend, rrija tërë ditën me të, dhe në një moment që ai akoma nuk ishte zgjuar nga gjumi, djali im u vra. E kam rritur me 100 mundime. Ku ishin policët, pse nuk ma ruajtën djalin, ma vranë në gjumë, vajton Hajria.

Gentian Beqiri akuzohej për vrasjen e biznesmenit Sokol Çapja në vitin 2005.

Policia thotë se ka arrestuar dy persona për këtë ngjarje. Ata janë nipi i biznesmenit Çapja, Florenc Çapja dhe Arben Jaçe. Të dy janë prezantuar si djemtë e tezes së Gentianit dhe kanë mundur të hyjnë në banesë, ku e kanë qëlluar Gentianin me silenciator. Ata kanë goditur edhe të atin, në mënyrë që të mos bënte zhurmë.

Në pranga kanë rënë edhe dy policët që duhej të ruanin Gentianin.