Të paktën 8 të vrarë, 20 të plagosur, nga sulmet në Irak

Të paktën 8 persona janë vrarë dhe më shumë se 20 të tjerë janë plagosur gjatë sulmeve të ndara në Bagdad, në lagjet e dominuara kryesisht nga shiitët.

Shumica e vrasjeve ndodhën në zonën veriperëndimore të Shulas, ku shpërtheu një automjet në të cilin ishte vendosur eksploziv.

Predha të shumta gjithashtu u hodhën në distriktin verior të Chikouk-ut. Ky vend është një kamp që strehon personat e zhvendosur brenda vendit, shumica prej të cilëve shiitë, të larguar nga zonat sunite.

Sulmet e sotme vijnë pas një seri bombardimesh në Bagdad dhe qytete të tjera gjatë ditës së shtunë, që lanë të vrarë më shumë se 12 njerëz.