Tensionet në Mitrovicë, autoritetet dënojnë sulmet
Mitrovicë, 13 shtator, NOA Veriu i Kosovës është tronditur sërish nga tensionet e krijuara mes palës shqiptare dhe asaj serbe, nga të dyja anët e lumit Ibër.
Kështu, mesa duket të irrituar që kanë festuar fitoren e Turqisë ndaj Serbisë në kampionatin botëror të basketbollit, disa serbë kanë hedhur gurë ndaj kosovarëve në urën e lumit Ibër në Mitrovicë.
Ka qenë vetë zëdhënësi i policisë së Kosovës, Besim Hoti, i cili ka konfirmuar se nuk ka pasur kontakt të drejtpërdrejtë ndërmjet pjesëmarrësve të incidentit.
Njësitet policore dhe ato të EULEX-it, kanë
dalë në vendin e ngjarjes dhe nuk kanë lejuar përshkallëzim të incidenteve, ka
thënë Hoti, duke shtuar se situata tani është nën kontroll.
Ndërsa zëdhënësja e EULEX-it, Karin Lindal, ka deklaruar se nga incidentet është
lënduar një polic i Francës.
Nga ana e tyre, autoritetet vendore dhe ato ndërkombëtare
në Kosovë i kanë dënuar fuqishëm incidentet në Mitrovicë, duke pohuar se ngjarjet
e tilla e dëmtojnë imazhin e Republikës së Kosovës dhe u shërbejnë vetëm atyre
që janë kundër paqes, stabilitetit dhe mirëqenies së të gjithë qytetarëve të
vendit pa dallim etnie e besimi.
n.e/NOA