Tensioni ne Veri. Serbet te shtena armesh ne ajer

Trupat e NATO-s  kanë përforcuar patrullimet në  pikat e kontrollit në të dyja anët e kufirit të Kosovës si dhe në qytetin e Mitrovicës, në një përpjekje për të parandaluar dhunën e mëtejshme. Komandanti i NATO-s në Kosovë tha se situata në kufi, ndonëse  ende e tensionuar, është  nën kontroll. Duke folur me gazetarët në Mitrovicë Erhard Buhler u shpreh: "Së bashku me Policinë e Kosovës dhe EULEX-in  ne jemi gati për të marrë masa drastike kundër atyre që do të përpiqen të rrezikojnë më tej  situatën".

Bashkimi Evropian gjithashtu rriti presionin për Kosovën dhe Serbinë që të distancohen  nga dhuna dhe të shënojnë progres në bisedimet dypalëshe. Negociatorët serbë u takuan me Buhler në qytetin verior të Zubin Potokut në një përpjekje për të parandaluar përshkallëzimin e dhunës por u shprehën të pakënaqur me rezultatin e bisedimeve  duke shtuar se KFOR-i kishte tejkaluar kompetencat e mandatit të tij.

"Ne patëm bisedime të gjata, por për fat të keq nuk kemi arritur një marrëveshje. Dështuam për shkak se komanda e KFOR-it nuk e kupton se janë duke u përdorur nga Prishtina. Pra, ata janë të vendosur ende për të garantuar  siguri për  praninë e Kosovës dhe punonjësit e doganave në të dy vendkalimet kufitare. Për ne kjo është e papranueshme. Në asnjë mënyrë KFOR-i  nuk mund të ndihmojnë punonjësit e doganave, ata mund të ndihmojë policinë, por jo punonjësit e doganave. Në mënyrë të qartë ata janë angazhuar në aktivitete të cilat shkojnë përtej mandatit të tyre. Çka  tregon gjithashtu se disa pjesë të bashkësisë ndërkombëtare mbështesin përpjekjet e autoriteteve të Kosovës për të ndryshuar gjendjen në terren me dhunë." deklaroi Stefanovic.

Kryenegociatori serb u shpreh gjithashtu skeptik për  vazhdimin e bisedimeve  ndonëse theksoi se  Beogradi zyrtar, nuk do të heqë dorë nga dialogu. Por nëse nuk arrihet marrëveshje dhe nëse situata në 'vendkalimet administrative' nuk kthehet në gjendjen e mëparshme, dialogu sipas tij nuk do të sjellë ndonjë rezultat. Forcat paqeruajtëse të udhëhequra nga NATO-ja, i deklaruan dy vendkalimet kufitare me Serbinë në veri, zona të kufizuara ushtarake, ndërsa kanë paralajëmruar se do të përdorin edhe armët e zjarrit në rast kërcënimi. Vendimi i KFOR-it  për deklarimin e dy vendkalimeve kufitare si zona të kufizuara ushtarake pasoi djegien e vendkalimit kufitar në Jarinë nga grupe serbësh, të cilët qëlluan me armë zjarri kundër trupave të NATO-s.

Delina BITRAKU

Azhornuar së fundi ( e premte , 29 korrik 2011 )