Thaçi, vizitë në Korenë e Jugut

Kryeministri i Kosovës, Hashim Thaçi është nisur për një vizitë treditore në Korenë e Jugut, për të marrë pjesë në Samitin Botëror të Paqes, organizuar nga Federata e Përgjithshme e Paqes.
Sipas një njoftimi të qeverisë kosovare, në këtë vizitë Thaçi do të takohet edhe me përfaqësues të biznesit korean, motiv për të cilin ai shoqërohet nga ministri i Ekonomisë, Besim Beqaj.
Sipas njoftimit të Kryeministrisë, Thaçit do t’i ndahet edhe çmimi Doctor Honoris Causa nga Universiteti Sun Mun i Seulit.
Gjithashtu, kreu i ekzekutivit kosovar do të marrë pjesë në ceremoninë e inaugurimit të presidentit të ri të Republikës së Koresë së Jugut.
Pjesë e delegacionit kosovar është edhe ministri i Jashtëm Enver Hoxhaj, si dhe deputeti i Kuvendit të Kosovës, Hydajet Hyseni, saktëson më tej komunikata zyrtare.