Tone negative gjatë fushatës presidenciale në SHBA

Anketa e fundit e zhvilluar nga gazeta New York Times dhe rrjeti CBS tregon se aktualisht gara presidenciale në SHBA është plotësisht e paparashikueshme. Presidenti Barack Obama dhe ish-guvernatori Mitt Romney janë mbërthyer në një konkurrencë të fortë ku, për momentin, asnjëri nuk ka epërsinë. Por ajo që po e karakterizon garën presidenciale gjatë javëve të fundit ka qenë toni i spikatur negativ i fushatës.

Fushata presidenciale po zhvillohet kryesisht përmes valëve të radios dhe televizionit, me një barazh reklamash negative nga të dy kandidatët. Një reklamë e Presidentit Obama thotë se kompanitë amerikane transferuan vende pune jashtë vendit, gjatë kohës kur Romney drejtonte firmën e investimeve Bain Capital.

Fushata e Romney i hedh poshtë akuzat dhe përgjigjet me një seri reklamash.

Lufta e reklamave lidhur me të kaluarën e Romneyt si biznesmen dhe kërkesa që ai të publikojë dokumentat e taksave që ka paguar, e kanë detyruar kandidatin republikan të hidhet në mbrojtje.

Romney po përpiqet ta përqendrojë debatin mbi gjendjen e ekonomisë gjatë mandatit të Presidentit Obama, që shfaqet në anketa si thembra e Akilit për Presidentin.

Presidenti, nga ana e tij, po përpiqet të mobilizojë përkrahësit.

Fushata e Presidentit Obama synon ta mbajë fokusin e debatit tek Romney dhe e kaluara e tij, thotë specialisti i anketave Peter Brown.