Tragjedia hekurudhore me 68 viktima, Spanja shpall tri ditë zi kombëtare

Spanja ka nisur tri ditë zie pas një prej aksidenteve më të rënda hekurudhore në historinë moderne të Evropës, ku të paktën 68 persona kanë humbur jetën dhe dhjetëra të tjerë janë plagosur.

Ekipet e emergjencës kanë punuar gjatë gjithë natës, nën ndriçimin e fuqishëm të projektorëve, për të prerë vagonët e dëmtuar dhe për të nxjerrë viktimat nga rrënojat. Autoritetet bëjnë me dije se disa prej personave që humbën jetën ende nuk janë identifikuar.

Aksidenti ndodhi mëngjesin e së mërkurës, kur një tren që udhëtonte nga Madridi drejt Seviljes u përplas me një tren tjetër që qëndronte i ndaluar në shina. Shkaqet e ngjarjes së rëndë janë ende nën hetim.

Kryeministri spanjoll, Pedro Sanchez, shprehu dhimbjen për tragjedinë, duke deklaruar se “e gjithë Spanja është në zi”. Ai theksoi se jetët janë shkatërruar, familjet janë ndarë dhe dhimbja është e jashtëzakonshme.

Ministria e Brendshme e Spanjës ka angazhuar qindra efektivë dhe punonjës të shërbimeve të emergjencës në vendngjarje për të ndihmuar në operacionet e kërkim-shpëtimit. Në terren po përdoren gjithashtu dronë dhe helikopterë për lokalizimin e viktimave dhe largimin e mbetjeve nga zona e aksidentit.

Sipas ministrit spanjoll të Transportit, Oscar Puente, treni i kompanisë private hekurudhore Iryo, i cili ishte ndalur në shina, kishte 147 pasagjerë në bord. Ndalimi i tij, sipas ministrit, kishte ardhur si pasojë e një defekti kompjuterik.

Hetimet vijojnë për të përcaktuar rrethanat e plota të aksidentit dhe përgjegjësitë për tragjedinë që ka tronditur vendin.