Tragjedia kujtohet me shfaqje

Më 28 mars mbushen 15 vjet nga tragjedia e Otrantos, kur nga përplasja e anijes Kateri i Radës me një gliser në Detin Adritatik u mbytën mbi 81 shqiptarë. Me një shfaqje teatrore kjo ditë përkujtohet edhe në Brindisi.

Sipas mediave italiane, në kujtim të viktimave kjo ditë do të përkujtohet edhe në Brindisi, ku do të jepet një shfaqje teatrore.

Kujtimi i tragjedisë do të fillojë me hedhjen e luleve në det, në portin ku ishte ankoruar anija Kateri i Radës, për të vazhduar pastaj në “Shtëpinë e Turistit”, ku nga ora 18:30 fillon inskenimi i një pjesë teatrore kushtuar tragjedisë. Teksti është shkruar nga dramaturgu dhe skenaristi, Francesco Niccolini.

Ndryshe, vënien në skenë e këtij teksti, që sqaron kronologjikisht ngjarjet e asaj nate, përfshirë edhe dhimbjen njerëzore e sekretet që deti i mori me vete, e bëri regjisori, Fabrizio Pugliese, që është ndër figurat më të njohura të teatrit puliez. Skena do të ketë dimensionet e anijes Kater i Radës, dhe ajo zë vetëm 81 spektatorë - aq sa edhe ishte numri i viktimave të tragjedisë, që as sot e kësaj dite s’ka gjetur drejtësi.

Kohë më parë, skulptori grek, Costas Varotsos, pjesën e sipërme të anijes së përmbytur e ka shndërruar në monument.