Tre muaj praktikë në Programin e Praktikave të Punës, Qeveria skemë të re për të rinjtë që duan të bëhen pjesë e administratës publike
Qeveria hap rrugën për punësimin e profesionistëve të rinj në institucione publike. Vetëm 250 prej tyre do përzgjidhen pas një praktike 3-mujore.
Të rinjtë e moshës 21 deri në 29 vjeç do të kenë një mundësi të re për të ndërtuar karrierë në administratën publike. Qeveria miratoi të mërkurën Programin Kombëtar të Praktikave të Punës, i cili synon t’i përgatisë profesionistët e rinj për përfshirje aktive në institucionet publike, përmes një periudhe 3-mujore praktike dhe një mundësie 1-vjeçare punësimi.
Kush mund të aplikojë?
Kriteret për t’u bërë pjesë e programit janë të qarta:
- Mosha 21–29 vjeç,
- Diplomë bachelor ose master nga një institucion i arsimit të lartë,
- Të mos ketë qenë më parë pjesë e këtij programi,
- Të mos ketë qenë i punësuar më parë në administratën publike (përveçse si punonjës administrativ).
Si funksionon programi?
Programi zhvillohet çdo vit dhe përbëhet nga:
- 3 muaj praktikë pranë institucioneve publike,
- 1 vit punësim me kontratë për 250 praktikantët më të suksesshëm.
Nga rreth 600 praktikantë që do të pranohen fillimisht, vetëm 250 do të përzgjidhen për të nënshkruar një kontratë pune.
Kush e organizon programin?
Programi menaxhohet nga Ministria për Rininë, e cila vepron si sekretariat teknik dhe bashkëpunon me institucionet shtetërore dhe ato të qeverisjes vendore. Çdo institucion cakton një person kontakti dhe një mbikëqyrës për çdo praktikant.
Trajnim dhe kompensim financiar
Gjatë praktikës, të rinjtë përfitojnë:
- 500 lekë/ditë si kompensim financiar,
- Trajnim nga ASPA (Shkolla Shqiptare e Administratës Publike).
Këto përfitime synojnë të sigurojnë një eksperiencë të plotë profesionale dhe përgatitje reale për punësim.
Si bëhet përzgjedhja për punësim?
Në fund të periudhës së praktikës, institucionet përkatëse përzgjedhin praktikantët më të suksesshëm, duke u bazuar në:
- Performancën gjatë praktikës,
- Pjesëmarrjen në trajnime,
- Vlerësimin përfundimtar nga mbikëqyrësi.
Përzgjedhja shpërndahet si më poshtë:
- Deri në 200 praktikantë për institucionet e administratës shtetërore,
- Deri në 50 praktikantë për institucionet e tjera publike.
Pagesa dhe pozicioni në punë
Të rinjtë e përzgjedhur për punësim do të klasifikohen jo më lart se niveli i specialistit IV-3, dhe pagesa do të mbulohet nga buxheti shtetëror përkatës për çdo institucion.
Në përfundim të çdo thirrjeje, të gjitha të dhënat mbi performancën dhe përfshirjen e praktikantëve do t’i raportohen Departamentit të Administratës Publike, si pjesë e një procesi transparent dhe të monitoruar.
/rtsh.al/