Turqit restaurojnë monumentet islamike

Sipas një marrëveshjeje të nënshkruar dje mes Ministrisë së Kulturës, Institutit të Monumenteve të Kulturës, Kryesisë së Administratës Turke për Zhvillim dhe Bashkëpunim e Kryeministrisë së Republikës së Turqisë (TIKA ) dhe Komunitetit Mysliman të Republikës së Shqipërisë, do të restaurohen monumentet e kulturës islamike që gjenden në Shqipëri. Projekti që do të financohet nga TIKA, ka si qëllim të restaurojë objektet e trashëgimisë kulturore historike, sipas projekteve të hartuara nga subjektet e kontraktuar nga TIKA, të miratuara nga Këshilli Kombëtar i Restaurimeve në përpjekje për të rijetëzuar objektet e përzgjedhura. MTKR nga ana e saj do të kontribuojë me mbështetjen institucionale, kapacitete teknike, profesionale dhe administrative për mbarëvajtjen e këtij programi. Synimi i kësaj marrëveshjeje është që trashëgimia kulturore të vihet në funksion të turizmit.