Twain bëhet me yll
Nga Express më 03 qershor 2011 në ora 11:38
Këngëtarja kanadeze e muzikës kantri, Shania Twain, ka fituar yllin në shtegun e të famshmëve në Hollyvood.
Ky është ylli i 2.242 në shtegun e njohur hollivudian, përkujtojnë mediat amerikane.
Ceremoninë me rastin e zbulimit të yllit e ka udhëhequr aktorja Bo Derek.
Twain gjatë karrierës ka shitur më shumë se 80 milionë ekzemplarë të albumeve.
Albumi i saj “Come On Over” nga viti 1997, me të cilin arriti famën botërore, është shitur në 39 milionë ekzemplarë, duke e bërë njërën nga artistet më të shitura të të gjitha kohërave.
Pas pushimit dhjetëvjeçar, fituesja e pesëfishtë e Grammy-t ka paralajmëruar kthimin e saj në skenën muzikore me albumin e ri, i cili do të dalë së shpejti në shitje.