UNESCO, thirrje për ruajtjen e trashëgimisë kulturore në Egjipt

UNESCO ka ftuar autoritetet egjiptiane dhe protestuesit që të mbrojnë trashëgiminë kulturore të vendit dhe të respektojnë lirinë e të shprehurit gjatë krizës së vazhdueshme politike atje.

Reagimi ka pasuar në vëmendje raportimet mbi tentim-grabitjet në Muzeun Egjiptian të Kajros dhe në vendet e tjera historike e kulturore.

Irina Bokova, drejtore e UNESCO-s, ka thënë se “trashëgimia kulturore e Egjipit, qoftë në monumente apo fakte, është pjesë e trashëgimisë antike të njerëzimit”.

“Vlera e 120 mijë artikujve në Muzeun Egjiptian në Kajro është e pamatshme, jo vetëm në kuptimin shkencor apo financiar, por edhe për faktin se ato pasqyrojnë identitetin kulturor të popullit egjiptas”, ka thënë zonja Bokova në një komunikatë për shtyp.