UT, degët ku kanë ndryshuar kuotat

Në Universitetin e Tiranës më shumë mundësi studimi për part-time do të ketë Fakulteti i Histori-Filologjisë. Në secilën prej tri degëve të Filologjikut, Histori, Gjeografi, Gjuhë-Letërsi, kuotat e pranimit do të jenë 250, që në total shkojnë në shifrën 750 pranime. Pas Filologjikut, një tjetër fakultet i Universitetit të Tiranës që do të presë një numër të konsiderueshëm studentësh në sistemin part-time është edhe Ekonomiku. Gjatë vitit të ri akademik, në dy degët e këtij fakulteti, Administrim-Biznes dhe Financë-Kontabilitet, do të pranohen 300 studentë, ndarë në mënyrë të barabartë 150 kuota në secilin program studimi. Krahasuar me një vit më parë, numri i kuotave në këto dy degë është ulur me 50 pranime. Po kaq është reduktuar numri i kuotave edhe në Fakultetin e Drejtësisë, që është një ndër më të preferuarit për studimet e pjesshme, sidomos për fakultet të dytë. Gjatë vitit të ri akademik, Juridiku do të pranojë 250 studentë në part-time, nga 300 që ka pasur një vit më parë. Në mënyrë të ndjeshme numri i pranimeve është ulur edhe në Fakultetin e Infermierisë, i cili nga 230 kuota që ka pasur një vit më parë, sivjet do të pranojë 150 studentë. Ndërsa për Biologjinë, këtë vit janë shtuar 50 kuota, duke e bërë 250 numrin total të pranimit në këtë degë. Një shtim i vogël kuotash është bërë edhe për dy degë të Fakultetit të Shkencave Sociale, Punë sociale dhe Psikologji, në të cilat këtë vit do të futen 20 student më shumë, e më konkretisht: 120 pranime në secilën prej tyre. Ndërkohë që për katër degë të Mjekësisë numri i pranimeve do të reduktohet edhe më shumë se vjet. Nëse një vit më parë në këto degë numri i kuotave ka qenë 60 për secilën prej tyre, këtë vit në Mami do të pranohen 20 studentë, në Teknik Imazherie 50, në Teknik Laboratori 50 dhe në Fizioterapi 30.