VARSHAVË – Polonia fajëson Rusinë për sulmin në linjën hekurudhore

VARSHAVË, 18 nëntor /ATSH-DPA/- Të gjitha indikacionet sugjerojnë se agjentët rusë qëndrojnë pas shpërthimit të linjës hekurudhore polake me rëndësi strategjike, tha sot Jacek Dobrzyński, një zëdhënës i koordinatorit të shërbimeve speciale.

Shinat e linjës hekurudhore nga Varshava në qytetin lindor të Lublinit u shkatërruan të dielën nga një pajisje shpërthyese.

Dëmi u vu re në kohë nga një makinist treni dhe u komunikua në qendrën e kontrollit, e cila e mbylli shinën.

“Shërbimet ruse duan të destabilizojnë shoqërinë tonë dhe të përhapin frikë”, tha sot Dobrzyński, pas një takimi të Komitetit të Sigurisë Kombëtare të qeverisë.

Autoritetet polake kanë paralajmëruar edhe më herët për kërcënimin e sabotimit rus – për shkak të mbështetjes së Varshavës për Ukrainën në mbrojtjen e saj kundër pushtimit të plotë të Moskës.

Rrjeti hekurudhor konsiderohet një objektiv, pasi shumë dërgesa ushtarake perëndimore në Ukrainë kalojnë nëpërmjet Polonisë. //a.i/