Vdes artisti më i vjetër botëror

Këngëtari i operetave me origjinë holandeze, por që ka bërë karrierë në Gjermani, Johannes Heesters, vdiq të shtunën në moshën 108-vjeçare. Ai konsiderohej artisti me aktivitetin më të gjatë në botë.

Artisti që u lind më 1903 në Holandë lavdinë e njohu në sajë të nazistëve, kur edhe njihej si i ledhatuar i Hitlerit. Para disa vitesh Heesters ishte akuzuar nga një gazetar se më 1941 kishte dhënë shfaqje para njësiteve të SS në kampin e përqendrimit Dachau, në Bavari.

Heesters ishte pjesë e Librit të Rekordeve të Guinness,si këngëtari dhe aktori më i vjetër me moshë që ende vazhdonte të shfaqej në skenë. Gjithashtu, aktori Heesters ka luajtur edhe në shumë filma të xhiruar në vendet gjermanishtfolëse, por edhe në teatër.