Vera 2026, rekord historik të temperaturave në Britani. Vala e të nxehtit pritet sërish të godasë vendin

Vera e vitit 2026 po shkon drejt vendosjes së një rekordi të ri temperaturash në Mbretërinë e Bashkuar dhe mund të bëhet më e nxehta që nga fillimi i regjistrimeve meteorologjike.

Sipas të dhënave paraprake nga Zyra britanike e Meteorologjisë, temperatura mesatare në të gjithë vendin nga 1 qershori deri më 10 gusht ka arritur në 16.48°C, rreth 1.88°C mbi mesataren e periudhës 1991-2020.

Nëse pjesa tjetër e gushtit vijon me temperatura mesatare, vera e këtij viti do të kalojë rekordin e vendosur vetëm një vit më parë. Në verën e vitit 2025, temperatura mesatare ishte 16.10°C.

Kjo verë është karakterizuar nga disa periudha të njëpasnjëshme me temperatura të larta. Një valë e fortë nxehtësie në fund të pranverës u pasua nga të tjera në qershor dhe korrik, ndërsa në disa zona periudhat e temperaturave të larta kanë vazhduar për javë të tëra.

Temperatura më e lartë e regjistruar deri tani ka qenë 38°C në Lingwood, Norfolk, më 26 qershor.

Nxehtësia e këtij viti ka sjellë një sërë rekordesh. Për herë të parë që nga fillimi i regjistrimeve, temperatura prej 35°C ose më shumë është arritur në tre muaj të ndryshëm, maj, qershor dhe korrik. Nëse parashikimet për temperatura deri në 38°C gjatë kësaj jave realizohen, edhe gushti do t’i bashkohet listës.

Korriku ishte gjithashtu muaji më i thatë i regjistruar ndonjëherë në Angli dhe Uells që nga nisja e regjistrimeve në vitin 1836. Në Anglinë Jugore u regjistrua muaji kalendarik më i thatë në historinë e matjeve.

Deri më 15 korrik, Mbretëria e Bashkuar kishte regjistruar më shumë ditë me temperatura mbi 30°C sesa gjatë gjithë vitit 1976, një prej viteve më të njohura për valët e gjata të të nxehtit.

Temperaturat e larta dhe mungesa e reshjeve kanë sjellë pasoja të drejtpërdrejta edhe për burimet ujore. Thatësira është shpallur në më shumë se dy të tretat e Anglisë dhe në të gjithë Uellsin. Rreth 45 milionë njerëz jetojnë në zona të prekura nga thatësira në Angli, ndërsa më shumë se 27 milionë persona përballen me kufizime në përdorimin e ujit.

Fakti që temperaturat prej 35°C janë regjistruar në disa muaj brenda të njëjtit vit tregon se ajo që dikur konsiderohej një ngjarje e rrallë po bëhet gjithnjë e më e zakonshme.

Në fund të shekullit të 20-të, temperatura prej 35°C ishte një dukuri shumë e pazakontë në Mbretërinë e Bashkuar. Sot, rekorde të tilla po thyhen në mënyrë më të shpeshtë.

/rtsh.al/