Videoskandali në zyrën e bashkisë, Safet Gjici dënohet me 2 vjet burg, 1 vit për Alma Kaçin
Ish-kryetari i bashkisë së Kukesit, Safet Gjici është dënuar me 2 vjet nga Gjykata e Posaçme Kundër Krimit dhe Korrupsionit pasi akuzohet për aferën e videoskandalit në zyrën e bashkisë së Kukësit dhe akuzat për korrupsion. Ndërsa Alma Kaçi është dënuar me 1 vit burg për prostitucion.
Sipas dosjes së SPAK, Gjici ka përfituar favore seksuale nga Alma Kaçi, duke i premtuar kësaj të fundit një projekt për qentë, ndërsa kjo e fundit ka ofruar favoret, duke kryer marrëdhënie seksuale orale në zyrën e punës së kryebashkuiakut.
Ndërkaq, ditën e sotme ish-kryebashkiaku Safet Gjici ka folur në seancën e mbajtur ndaj tij mbi video-skandalin me Alma Kaçin si dhe për aferën e korrupsionit mbi tenderin e qenve në Kukës.
Përpara trupës gjyqësore, si avokatët mbrojtës ashtu edhe vetë Gjici kanë deklaruar se në rastin e tij nuk ka korrupsion “pasi tenderin e jep këshilli bashkiak dhe jo kryetari i Bashkisë”.
Nga ana e tij, Gjici ka kërkuar pafajësi ndërsa theksoi se nuk ka shkelur asnjë ligj përveç etikës.
Ai vuri në dukje se videoja është paguar nga kundërshtari i tij politik Abedin Uruçi duke rënë më pas në kurthin e tij.
“Kërkoj pafajësi, nuk kam shkelur asnjë ligj e asnjë nen. Kam shkelur vetëm etikën. U kërkoj falje familjarëve dhe kuksianëve.
Video u pagua nga kundërshtari im politik Abedin Uruçi. Ajo që se bënë dot me vota e bënë me këtë provokim që edhe unë them pse rashë pre e këtij kurthi.
Abedin Uruçi e pagoi videon për hakmarrje se unë kur u bëra kryebashkiak o ndalova atij zaptimin e një trualli mijëra metra katrorë në Kukës”, është shprehur Safet Gjici.
/rtsh.al/