Virozat e verës, fluks pacientësh nëpër spitale, mjekët japin këshilla

Elbasan- Moti i paqëndrueshëm, por i shoqëruar me temperatura të larta ka sjellë është një fluks personash që kërkojnë trajtim mjekësor në spitalet e vendit.

Mësohet se në repartin e Pediatrisë së Elbasanit ka patur një rritje të numrit të fëmijëve, afro 60 në ditë, që paraqiten për të marrë ndihmën mjekësore për shkak të prekjes nga virozat.

Megjithatë bluzat e bardha të këtij spitali thonë se rastet e shtrimit janë më të pakta se ato që vizitohen. Sipas mjekëve fëmijët paraqiten në pediatri me simptoma si temperaturë e lartë, diare dhe të vjella.

Mjekët i bëjnë apel prindërve të tregohen të kujdesshëm, duke shmangur ekspozimin në diell të fëmijëve gjatë orëve të pikut, 11:00-16:00. Ata thonë se duhet të tregohet kujdes veçanërisht me higjienën personale të fëmijës dhe ushqimeve që konsumojnë. Sakaq mjekët rekomandojnë të konsumohet sa më shumë ujë dhe lëngje natyrale.