Vjen Doruntina, anulohet konferenca

Ka një tendencë të përgjithshme për të dramatizuar veprat e Ismail Kadaresë.

Pas "Gjeneralit të Ushtrisë së vdekur", vënë së fundi në Teatrin e Shkupit, vjen sonte në Teatrin Kombëtar, "Doruntina". Një bashkëpunim i teatrove "Oda", Prishtinë dhe "Blessed Unrest", Nju Jork

Takimin për t'u prezantuar me gazetarët e kishin në orët 18.00. Ishin të vetëdijshëm për vonesën, por jo për mosardhjen. Megjithatë, e pritën natyrshëm njoftimin se "media nuk do të ishte e pranishme në këtë konferencë shtypi".

Regjisori kosovar, Florent Mehmeti dhe amerikania Jessica Burr tregojnë për "Shekulli"-n rreth shkëmbimit të kësaj përvoje teatrore, konceptet regjisoriale dhe si është pritur nga publiku amerikan ky dramatizim i novelës së Kadaresë, sipas Matt Opatrny dhe Lirak Liçajt. Për herë të parë preku skenën "InterArt Theatre" tetorin e vitit të kaluar.

"Për herë të parë jam njohur me këtë vepër në vitin 1994 dhe më tepër më tërhoqën dy aspektet e trajtuara: "Besa" si një vlerë shumë e rëndësishme dhe "Dashuria e motrës për vëllanë", një linjë shumë e veçantë",- u shpreh regjisorja Burr.

Kurse Mehmeti shpjegon se e gjithë shfaqja është ndërtuar sipas një teknike të veçantë, e cila kërkon të shfrytëzojë të gjitha aftësitë e aktorit, të lënë në një skenë pa dekor.

Në kësi shfaqjesh, publiku e përqendron të gjithë vëmendjen tek loja e aktorit në skenë, pa u çoroditur nga objektet që e rrethojnë. "Edhe pse bëhet fjalë për një shfaqje dygjuhëshe, dialogu rrjedh dhe historia është e kuptueshme", - shpjegon Mehmeti.

Sonte në mbrëmje, në orën 20.00, në skenën e Teatrit Kombëtar do të ngjiten aktorët kosovarë Ilire Vinca Çelaj, Lirak Çelaj, Nëntor Fetiu, Njomëza Ibraj dhe amerikanët, Zenzele Cooper, Dave Edson, Jason Griffin, Kelly Hayes, Matt Opatrny, Laura Wickens.