Vorskla nuk e lëshon Januzin

Pas zërave se sulmuesi kosovar mund t’i bashkohet shumë shpejt klubit nga Bundesliga gjermane, Hannover por gjithçka ka stopuar trajneri i klubit ukrainas, Nikolai Pavlov, i cili siguron që ish-futbollisti i Kosovës së Vushtrrisë, do të mbetet në Ukrainë.

“Januzi do të mbetet në Vorskla së paku deri në fund të sezonit”, ka thënë Pavlov për uebfaqen zyrtare të klubit.

23-vjeçari e ka vazhduar së fundmi kontratën me Vorsklën deri në vitin 2014. përkundër këtij fakti, mediat gjermane shkruajnë se trajneri i Hannoverit, Mirko Slomka e ka përcjellë me vëmendje përfaqësuesin shqiptar, për të cilin ka simpati të madhe.

Gjithashtu, thuhej se futbollisti shqiptar, Altin Lala, i cili aktivizohet te ky ekip, ishte si një lloj ndërmjetësuesi për transferimin e Januzit në Gjermani. Mirëpo, deklaratat e fundit të trajnerit Pavlov i kanë hedhur poshtë të gjitha mundësitë.