Vrasja e efektivit në Fier, Policia: 30 000 euro për këdo që informon vendndodhjen e autorit
TIRANË, 13 maj /ATSH/ Policia e Shtetit vë në dispozicion shpërblimin 30 000 euro për këdo që jep informacion për vendndodhjen e të dyshuarit për vrasjen e efektivit të Policisë në Fier.
“Në lidhje me ngjarjen e ndodhur në fshatin Baltëz, ku u vra me armë zjarri, punonjësi i Policisë (jashtë shërbimit), shtetasi N. C., Policia e Shtetit kërkon ndihmën dhe bashkëpunimin e qytetarëve për lokalizimin e autorit të dyshuar të vrasjes, shtetasit Azgan Mernica, 23 vjeç, banues në fshatin Sulaj. Kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit vë në dispozicion shpërblimin 30 000 euro”, bën të ditur Policia.
“Ndërkohë, shërbimet e Policisë së Fierit, Forca Kombëtare e Sigurisë dhe Reparti Special RENEA, në drejtimin e drejtorit të përgjithshëm të Policisë së Shtetit, vijojnë veprimet operacionale në zonë, me qëllim kapjen dhe vënien në pranga të 23-vjeçarit. Gjithashtu, në të gjitha akset rrugore lidhëse me qarkun Fier janë ngritur pika kontrolli. Grupi hetimor, nën drejtimin e Prokurorisë, po vijon veprimet në vendngjarje për të sqaruar dhe dokumentuar me prova ligjore rrethanat e rastit”, përfundon njoftimi i Policisë.
Vritet efektivi i forcave “Shqiponja” në Fier, Policia: Shkak, një konflikt i çastit
/a.f/r.e/