Vuri në pikëpyetje politikat për zero Covid, Kina i censuron fjalën kreut të OBSH

Kina ka censuruar në dy platformat e mëdha sociale në Weibo dhe WeChat fjalët e Kreut të Organizatës Botërore të Shëndetësisë, Tedros Adhanom Ghebreyesus, pasi vuri në pikëpyetje politikat e vendit për zero Covid.

“Kur flasim për strategjinë zero-Covid, ne nuk mendojmë se është e qëndrueshme, duke marrë parasysh sjelljen e virusit tani dhe atë që ne parashikojmë në të ardhmen. Ne e kemi diskutuar këtë çështje me ekspertë kinezë dhe kemi treguar se qasja nuk do të jetë e qëndrueshme…Unë mendoj se një ndryshim do të jetë shumë i rëndësishëm”, tha Tedros në një konferencë për media.

Kjo deklaratë ka nxitur Kinën që të vendosë të censurojë fjalimet, fotot dhe videot e kreut të OBSH. Sipas CNN, në WeChat, një artikull nga llogaria zyrtare e OKB-së që përfshinte komentet e Tedros, është “ndaluar të shpërndahet për shkak të shkeljes së ligjeve dhe rregulloreve përkatëse”. Videoklipet e fjalimit të Tedros janë hequr gjithashtu nga platforma.

/rtsh.al/