Wembley, nikoqir i finales së Euro 2020

Stadiumi Wembley është kandidat për nikoqir të finales së Euro 2020, ka njoftuar Sunday Mirror. UEFA dëshiron që Evropiani pas tetë vitesh të zhvillohet në shtete të ndryshme për të shënuar 60 vjetorin e Federatës evropiane të futbollit.

Stadiumi i famshëm londinez thuhet se është “favorit” për të qenë nikoqir jo vetëm i finales por edhe dy takimeve gjysmëfinale si pjesë e “javës finale” që do të shënonte kulminacionin e garës së përbërë nga 24 skuadra përfaqësuese. Ideja e zhvillimit të garës kontinentale në 12 shtete të ndryshme ka ndarë tifozët, dhe disa besojnë se ky propozim mund të zmadhojë karakterin e kompeticionit kurse të tjerët frikësohen se do të humb atmosfera unike.

Delegatët e UEFA-së pritet të votojnë rreth këtij propozimi në dhjetor. Vendimi përfundimtar do të vjen në janar ose shkurt të vitit të ardhshëm por presidenti i UEFA-së, Michel Platini duket se insiston rreth aprovimit të idesë.

“Është një ide rreth së cilës jam vërtetë i vendosur. Do të jetë shumë më lehtë nga këndvështrimi financiar. Nevojiten vendime politike. Ne nuk kemi nevojë të ndërtojmë stadiume ose aeroporte. Kjo mund të jetë me rëndësi gjatë krizës ekonomike”, u shpreh francezi.