Woody Allen ia ndryshon titullin filmit

Titulli i filmit të ardhshëm të regjisorit Woody Allen, i cili është xhiruar në Romë, është ndryshuar në ‘Nero Fiddled’. Allen me sa duket e ka marrë vendimin pasi ka nxjerrë përfundimin se titulli fillestar, ‘The Bop Decameron’, ishte shumë konfuz.

Në një deklaratë Allen tha: “Nuk mund ta besoj se sa pak njerëz kanë dëgjuar për ‘Dekameronin’ madje edhe në Romë. Dhe ata pak njerëz që kanë dëgjuar për të kanë supozuar se filmi ishte i bazuar në tregimet e Boccaccio-s, gjë që nuk është kështu”.

Roma është ndalesa e fundit europiane për regjisorin Allen pas një vargu të filmave të vendosur në Britani, Spanjë dhe Francë, i fundit prej të cilëve, ‘Midnight in Paris’, është bërë filmi më i suksesshëm komercial në karrierën e tij si regjisor.

‘Nero Fiddled’, përmbledhja në katër pjesë e tregimeve të vendosura në kryeqytetin italian, ka në kast aktorët Jesse Eisenberg, Ellen Page, Penelope Cruz dhe Roberto Benigni, bashkë me vet Allen dhe pritet të lëshohet në vitin 2012.