Zeneli, gati për Finlandën
Erfan Zeneli mund ta ndjekë rrugën e futbollistëve tjerë shqiptarë, si vëllezërit Shefki e Njazi Kuqi, Përparim Hetemaj, Berat Sadik etj, për të luajtur me përfaqësuesen e Finlandës. Në fakt, mesfushori kosovar është ftuar në një kamp, ku do të përfshihen futbollistët finlandezë që luajnë në shtetet skandinave.
Ky grumbullim do të bëhet të martën e ardhshme, ndërsa do të zgjasë tri ditë. Aty janë ftuar lojtarët që shkëlqyen këtë sezon në këto vende, përfshirë edhe 24 vjeçarin nga Kosova. Ai ndihet i privilegjuar për këtë fakt, ndërsa thotë se do të mundohet t’i bind mbikëqyrësit e këtij kampi me cilësitë e tij për të ecur përpara.
“Kampi do të fillojë të martën që vjen dhe unë do të jem pjesë e tij. I kanë ftuar lojtarët që patën vit të mirë, duke më përfshirë këtu edhe mua. Unë do të mundohem që t’i bind trajnerët dhe që në të ardhmen të jem pjesë e përfaqësueses A të Finlandës. Mendoj se kam kualitete të duhura për ta bërë këtë”, deklaroi Zeneli për Express.
Ish përfaqësuesi U-21 i Finlandës ndihet i zhgënjyer që nuk ka marrë ftesë nga përfaqësuesja e Kosovës. Ai do të dëshironte të luante për vendin e tij, por nuk e ka aspak problem të luajë për Finlandën. Futbollisti ofanziv e ndihmoi Helsinkin që ta fitojë titullin e kampionit në Finlandë.
Lëndimet e shpeshta në të kaluarën nuk e kishin lënë rehat, por këtë sezon nuk e pati këtë problem dhe ia doli mbanë. Atij i përfundon kontrata pas përfundimit të sezonit në Finlandë, por palët kanë një opsion për vazhdimin e saj edhe për një vit. Por, nuk përjashtohen edhe mundësitë tjera.
“Unë jam i kënaqur në Helsinki, me të cilin kemi opsion edhe për një vit. Këtu do ta kem mundësinë që të luaj edhe në Ligën e Kampionëve sezonin e ardhshëm. Por, nëse arrin ndonjë ofertë nga një ekip më i mirë, do ta marr në konsideratë”, shtoi ai.
Bashkë me Berat Sadikun, Erfan Zeneli e ndihmuan më së shumti Helsinkin në sukseset e këtij viti. Dhe, paraqitjet e tij të mira të këtij sezoni duket se do ta shpërblejnë me ftesë në përfaqësuesen finlandeze.