Zgjedhjet e 6 marsit 2022 në Shqipëri, KiE: Për herë të parë në 30 vite rezultati u pranua nga të gjitha palët
Për herë të parë në 30 vite zgjedhje në Shqipëri, rezultatet e zgjedhjeve të pjesshme vendore të 6 marsit 2022 u pranuan nga të gjithë garuesit dhe nuk u kontestuan duke treguar një ndryshim pozitiv. Ky ishte përfundimi i raportit të përpiluar nga raportuesi i KiE, Stewart Dickson, i cili kryesoi delegacionin e vëzhguesve në Shqipëri.
Raporti u prezantua në seancën e 43-të plenare të Kongresit të Autoriteteve Lokale dhe Rajonale të Këshillit të Evropës , ku përtej vlerësimit në tërësi të zhvillimit të procesit zgjedhor, ka kërkuar zbatimin e rekomandimeve të Komisionit të Venecias që nga depolitizimi i komisioneve zgjedhore deri tek rishikimi i legjislacionit për shpifjen dhe rritjen e pjesëmarrëseve gra në zgjedhje.
“Pavarësisht disa tensioneve që rrjedhin nga bojkotimi i zgjedhjeve vendore 2019 nga opozita dhe përçarja e brendshme brenda Partisë Demokratike, zgjedhjet e pjesshme vendore të 2022 kaluan pa probleme dhe pa shqetësime të mëdha. Kongresi shprehu kënaqësinë për zgjedhjet e rregullta dhe të administruara mirë dhe me fushatën në të cilën rregullat përkatëse u respektuan përgjithësisht nga të gjitha palët e interesuara. Delegacioni i Kongresit mirëpriti fuqishëm faktin që rezultatet e zgjedhjeve u pranuan nga të gjithë garuesit dhe nuk u kontestuan, për herë të parë në tridhjetë vjet në Shqipëri.
Raporti i Kongresit identifikoi gjithashtu disa fusha ku ka ende hapësirë për përmirësim, veçanërisht në lidhje me zbatimin e rekomandimeve të mëparshme nga Komisioni i Venecias të cilat mbeten për t’u adresuar, duke përfshirë masat për depolitizimin e komisioneve zgjedhore të nivelit më të ulët dhe përgjegjësinë penale ende ekzistuese për shpifje. Raporti fton autoritetet shqiptare të trajtojnë këto rekomandime të kahershme dhe të rrisin përpjekjet për të promovuar pjesëmarrjen e grave kandidate në zgjedhjet për kryetar bashkie”, thuhet në raport.
Në raport sugjerohet masa për të siguruar kushte të lira për raportimin e mediave dhe masa mbrojtëse për të parandaluar keqpërdorimin e burimeve administrative, për të ofruar kushte të barabarta për të gjithë garuesit.
Në fund theksohet se “ndryshimi pozitiv i arritur gjatë këtyre zgjedhjeve të pjesshme do të vazhdojë në vitin 2023, si p.sh. të gjitha partitë pjesëmarrëse në zgjedhje dhe pranimi nga të gjithë garuesit e rezultateve përfundimtare”.
/rtsh.al/