Zgjedhjet në Cërrik, mbërrijnë kutitë e para të votimit në KZAZ

Menjëherë pas mbylljes zyrtare të votimit për zgjedhjen e kryetarit të ri të Bashkisë Cërrik, ka nisur faza tjetër thelbësore e procesit: dërgimi i kutive të votimit drejt Komisionit të Zonës Administrative Zgjedhore (KZAZ).

Kutitë e para, së bashku me dokumentacionin shoqërues, kanë mbërritur në ambientet e KZAZ-së dhe po merren në dorëzim nga anëtarët e komisionit. Kjo shënon fillimin e procedurave për verifikimin e dokumentacionit dhe përgatitjen për numërimin e votave.

Sipas procedurave, pas dorëzimit dhe verifikimit të të gjithë materialit zgjedhor, do të fillojë procesi i numërimit.

Dita e votimit në Cërrik përgjithësisht ka kaluar në qetësi dhe nën vëzhgimin e institucioneve përgjegjëse, ndërsa vëmendja tani zhvendoset te KZAZ-ja.

/rtsh.al/