Zgjedhjet parlamentare në Ukrainë, pritet të fitojë Janukoviç

Ukrainasit po votojnë sot në zgjedhjet parlamentare nën hijen negative që ka krijuar burgosja e udhëheqëses së opozitës Julia Timoshenko dhe mes shqetësimeve për shkelje gjatë procesit. Partia e Rajoneve, e Presidentit Viktor Janukoviç, pritet të fitojë, ndërkohë që opozita është e ndarë në dy kampe kryesore, atë të ish-Kryeministres dhe grupit pro-perëndimor, Udar, i udhëhequr nga kampioni i botës në boks Vitali Klitschko.

Me ish-Kryeministren karizmatike në burg, ku vuan një dënim shtatë-vjeçar për shpërdorim të detyrës, dhe me opozitën të ndarë midis dy partive kryesore, Partia e Rajoneve e Presidentit Viktor Janukoviç pritet ta mbajë shumicën në parlament.

Presidenti votoi në kryeqytetin e vendit, Kiev.

"Votova për stabilitet dhe rritje ekonomike në Ukrainë, për një jetë më të mirë për popullin tonë. Mendoj se këto zgjedhje do ta mbajnë të bashkuar Ukrainën" tha ai.

Perëndimi po i kushton vëmendje votimeve në shtetin strategjik, ish-anëtar i Bashkimit Sovjetik, që gjendet mes Rusisë dhe Bashkimit Evropian në zgjerim, dhe që është përgjegjës për transportimin e furnizimeve të energjisë në shumë vende të BE-së. Një paraqitje e fortë e Partisë së Rajoneve të Presidentit Janukoviç do të forconte kontrollin e pushtetit prej tij dhe ka gjasa ta largonte Ukrainën nga Perëndimi edhe më tej.

Mbajtja në burg e 51-vjeçares Timoshenko – udhëheqëse e Revolucionit Portokalli të vitit 2004, që rrëzoi nga pushteti zotinYanukovych – ka ndikuar në dobësimin e opozitës në vend.

Yevgenia Timoshenko, e bija e ish Kryeministres, u shpreh kështu pas votimit.

"Zakonisht ka qenë traditë të votoja me prindërit e mi, Julia dhe Aleksandër Timoshenko. Sot, regjimi i ka detyruar ata të mos marrin pjesë në zgjedhje, dhe nëna ime u përjashtua nga fushata zgjedhore dhe nga jeta politike. Ajo është arrestuar në mënyrë të paligjshme."

Partia e zonjës Timoshenko po kandidon në zgjedhje, duke u ndeshur me grupin tjetër pro-perëndimor, Udar, i udhëhequr nga kampioni i botës në boks Vitali Klitschko. Partia e zotit Klitschko ka fituar popullaritet në muajt e fundit, duke theksuar zhgënjimin e votuesve ndaj viteve në pushtet si të Presidentit Janukoviç edhe ato të ish-Kryeministres Timoshenko.

Paraqitja e opozitës në zgjedhje e pabashkuar ka qenë pozitive për interesat politike të Presidentit Janukoviç.