Zhvillime dramatike- Trump bisedon me Putin, ndalon armët për Ukrainën ndërsa lufta intensifikohet

Një zhvillim i papritur është vënë re sot në marrëdhëniet ndërkombëtare, ku Presidenti rus Vladimir Putin njoftoi se do të zhvillojë një bisedë telefonike me Presidentin amerikan, Donald Trump. Kjo bisedë, e planifikuar për në orën 10:00 sipas kohës lokale (16:00 sipas orës shqiptare), vjen në një moment kritik, ndërsa raportohet se administrata Trump ka ndaluar dërgesat e disa armëve thelbësore për Ukrainën, duke shkaktuar reagime të forta në Evropë.

Donald Trump e bëri të ditur se do të zhvillojë bisedë telefonike me Putin në rrjetin e tij social Truth. Menjëherë pas kësaj, mediat raportuan se Presidenti ukrainas Volodymyr Zelensky do të flasë nesër me Trump për të diskutuar ndërprerjen e papritur të disa dërgesave të mëdha të armëve amerikane në Kiev. Sipas Politico dhe Financial Times, SHBA dhe Ukraina po punojnë për të organizuar këtë telefonatë pas ndalimit të sistemeve të mbrojtjes ajrore dhe raketave. Një diplomat evropian theksoi se SHBA ende po përcakton “si ta mbështesë më mirë mbrojtjen e Ukrainës”, duke shtuar se kjo mbetet një përparësi.

Vendimi i Trump ka ndezur alarm në Evropë. Presidentja e Komisionit Evropian, Ursula von der Leyen, deklaroi se ky është një “sinjal i qartë për të rritur përpjekjet tona për të mbështetur Ukrainën, jo vetëm në nivelin e BE-së, por edhe në nivelin evropian.”

Kryeministrja daneze Mette Frederiksen, kryetare e presidencës së radhës së BE-së, shprehu shpresën se partneriteti me Kievin do të vazhdojë, pasi një ndalim i tillë do të ishte “një pengesë serioze për BE-në dhe NATO-n.” Ajo theksoi se “Ukraina i përket Bashkimit Evropian” dhe se presidenca daneze do të bëjë gjithçka për ta ndihmuar Ukrainën drejt anëtarësimit, duke shtuar se “ne duhet ta forcojmë Ukrainën dhe duhet ta dobësojmë Rusinë, duke rritur mbështetjen ushtarake për Ukrainën.”

Ndërkohë, Presidenti ukrainas Volodymyr Zelensky zbarkoi në Kopenhagen, në rrugën e tij për në Aarhus, për të marrë pjesë në ceremoninë që shënon fillimin e Presidencës daneze të BE-së. Në Aarhus, Zelensky do të takohet me von der Leyen dhe Frederiksen, ku pritet të mbajë edhe një konferencë shtypi.

Tensionet rajonale, Hungaria kundër

Në një tjetër zhvillim, kryeministri hungarez Viktor Orban përsëriti qëndrimin e tij të fortë kundër pranimit të Ukrainës në BE. Sipas zëdhënësit të qeverisë Zoltan Kovacs në Twitter, Orban citohet të ketë thënë se “Ukraina po e sulmon gjithnjë e më agresivisht Hungarinë sepse ne në Bruksel kemë bllokuar pranimin e saj në BE.” Ai shtoi se Hungaria “nuk e mbështet pranimin e Ukrainës në BE” për arsye themelore dhe strategjike, duke deklaruar se “ne nuk duam luftë dhe nuk do të lejojmë shkatërrimin e ekonomisë evropiane, përfshirë atë të Hungarisë.” Orban i bëri thirrje Kievit të pranojë se “nuk u takon atyre t’i tregojnë popullit hungarez se çfarë të mendojë.”

Në frontin e luftës, situata mbetet e tensionuar. Manolis Pilavov, ish-kryetari i bashkisë së Luganskut, një rajon i aneksuar nga Rusia, u vra sot në një sulm, sipas agjencisë Ria Novosti. Familja e tij konfirmoi vdekjen. Më herët, ishte raportuar një shpërthim në qendër të kryeqytetit, me një të vdekur dhe tre të plagosur. Pilavov kishte shërbyer si kryetar bashkie nga viti 2014 deri në vitin 2023.

Forcat ruse gjithashtu nisën një sulm me raketa balistike në Odessa, duke vrarë dy persona dhe plagosur tre të tjerë. Kreu i administratës ushtarake të Odessës, Oleg Kiper, citoi Ukrainska Pravda të thoshte se “infrastruktura e portit u godit nga një raketë balistike me klaster, përdorimi i së cilës është i ndaluar.”

Natën, trupat ruse sulmuan territorin ukrainas me 52 dronë, ku 40 prej tyre u shkatërruan nga forcat e mbrojtjes ajrore ukrainase, sipas Forcave Ajrore Ukrainase. Sulmet u fokusuan kryesisht në rajonet jugore dhe veriore. Dje vonë në mbrëmje, shpërthime u dëgjuan në Kiev, ndërsa rusët goditën edhe Odessën, duke dëmtuar ndërtesa banimi dhe plagosur katër persona.

Ndërkohë, një grua u vra dhe dy persona u plagosën në rajonin Lipetsk të Rusisë kur mbeturinat e një droni goditën një shtëpi private, raportoi guvernatori i rajonit, Igor Artamonov.

The Wall Street Journal raporton se raketat dhe sistemet kundërajrore amerikane për Kievin, të premtuara më parë nga Pentagoni, janë bllokuar në Poloni. Këto përfshijnë më shumë se dy duzina raketa PAC-3 Patriot, më shumë se dy duzina sisteme mbrojtjeje ajrore Stinger, raketa ajër-tokë Hellfire dhe më shumë se 90 raketa ajër-ajër AIM, të gjitha të destinuara për përdorim me avionët F-16 të Ukrainës. Kjo situatë krijon një pasiguri të madhe për mbështetjen ushtarake të Ukrainës në një kohë kur intensiteti i luftimeve po rritet. Ansa

/rtsh.al/