Çeku udhëtoi për Letoni

Ministri i Forcës së Sigurisë së Kosovës, Agim Çeku së bashku me zëvendëskomandantin e FSK-së gjeneralmajor Rrahman Rama dhe Sinan Geci, shef i seksionit për integrime euro-atlantike në Ministrinë për Forcën e Sigurisë së Kosovës, udhëtuan sot, për një vizitë zyrtare treditore në Letoni, ka bërë të ditur kjo Ministri përmes një komunikate për media.

Sipas kësaj komunikate, ministri i FSK-së Agim Çeku, gjatë qëndrimit në Letoni, do të ketë takime të shumta zyrtare, në Ministrinë e Mbrojtjes, ku do të pritet nga Ministri i Mbrojtjes së Letonisë, Artis Pabriks, me të cilin do të bisedojnë për vazhdimin e bashkëpunimit të mëtejmë ndërmjet të dy ministrive.

Gjithashtu, ministri Çeku dhe zëvendëskomandanti i FSK-së, Rama do të kenë takime zyrtare edhe me komandantin e Forcave të Armatosura të Republikës së Letonisë, gjeneralmajor Raimonds Graube.

Delegacioni i FSK-së, gjatë qëndrimit në Letoni do të vizitojë Akademinë e Mbrojtjes si dhe disa shkolla dhe njësi ushtarake të këtij vendi.

Vizita do të konkretizojë fushat e bashkëpunimit në bazë të marrëveshjes së bashkëpunimit të nënshkruar gjatë këtij viti në mes dy ministrive, MFSK-së dhe Ministrisë së Mbrojtjes të Letonisë, thuhet në fund të komunikatës. /kosovapress/