Aksident rrugor me pasojë vdekjen në Yrshek, arrestohet drejtuesi i automjetit
Një aksident automobilistik me pasojë vdekjen e një personi është regjistruar mesditën e sotme në periferi të Tiranës, saktësisht në zonën e Yrshekut, në afërsi të qendrës tregtare QTU. Në aksident janë përfshirë një automjet dhe një motomjet, duke shënuar një tjetër ngjarje të rëndë në akset urbane të kryeqytetit.
Sipas të dhënave të para-raportuara nga vendngjarja, përplasja ka rezultuar fatale për drejtuesin e motorit, një i ri i moshës 21-vjeçare. Pas përplasjes, strukturat e Policisë së Shtetit kanë kryer shoqërimin dhe arrestimin e drejtuesit të automjetit, me qëllim kryerjen e veprimeve të mëtejshme procedurale dhe zbardhjen e shkaqeve të ngjarjes.
Sektori i qarkullimit rrugor po vijon punën në terren për administrimin e provave dhe përcaktimin e përgjegjësive ligjore të palëve të përfshira.
“Aksidenti me pasoje humbje jete ka ndodhur afër QTU. Humb jetën një 21 vjeçar i cili po udhëtonte me motorr. E ka përplasur nje 53-vjeçar me makinë”, raportoi fillimisht gazetarja e RTSH, Flutura Tota.
Dinamika e plotë dhe rrethanat specifike të kësaj përplasjeje mbeten nën hetim zyrtar, teksa autoritetet policore kanë vënë në dispozicion edhe të dhënat e para të identifikimit të personave të përfshirë përmes një komunikate për mediat.
“Rreth orës 15:15, në rrugën “Gryka e Kaçanikut”, automjeti me drejtues shtetasin A. M., rreth 52 vjeç, është përplasur me motomjetin me drejtues shtetasin D. G., rreth 21 vjeç. Si pasojë e aksidentit ka humbur jetën shtetasi D. G, ndërsa shtetasi A. M, është shoqëruar në Komisariat, për veprime të mëtejshme procedurale. Grupi hetimor po punon për sqarimin e rrethanave të aksidentit”, njoftoi zyrtarisht Policia e Shtetit.
/rtsh.al/