BE akuzon TikTok për dëmtimin e shëndetit mendor të përdoruesve, rrezikon gjobë deri në 6% të xhiros globale
Teknologji | 21 minuta më parë
Komisioni Evropian ka akuzuar paraprakisht platformën TikTok për dështim në mbrojtjen e shëndetit mendor të përdoruesve, duke paralajmëruar se algoritmi i saj mund të ekspozojë të rinjtë dhe personat vulnerabël ndaj përmbajtjeve të dëmshme.
Në përfundimet paraprake të hetimit të publikuara kwtw të premte, rregullatori evropian thekson se sistemi i rekomandimeve të TikTok mund t’i çojë përdoruesit në një cikël të vazhdueshëm videosh mbi tema të caktuara, nga imazhi trupor dhe dietat deri te izolimi, ankthi dhe çrregullimet e të ngrënit.
Sipas Komisionit, edhe pse një video e vetme mund të mos përbëjë problem, ekspozimi i përsëritur ndaj dhjetëra përmbajtjeve të ngjashme mund të ketë pasoja negative për shëndetin mendor.
Zyrtarët evropianë kanë konstatuar gjithashtu se disa prej mekanizmave mbrojtës të platformës nuk janë efektivë.
Edhe kur përdoruesit zgjedhin opsionin “Nuk jam i interesuar” për një video, algoritmi mund t’u rekomandojë sërish përmbajtje të ngjashme. Po ashtu, rifreskimi i faqes kryesore ofron vetëm një ndërprerje të përkohshme nga videot e së njëjtës tematikë.
“Sa herë që një përdorues shfleton ose pëlqen një video në TikTok, algoritmi shërben më shumë nga e njëjta gjë, duke i çuar përdoruesit në vrima lepurushi nga të cilat nuk mund të shpëtojnë lehtë”, deklaroi Henna Virkkunen, zyrtarja e Komisionit Evropian përgjegjëse për politikën teknologjike.
Ajo i bëri thirrje kompanisë të shtojë përpjekjet për mbrojtjen e mirëqenies së përdoruesve, veçanërisht të të miturve.
Nga ana tjetër, TikTok ka kundërshtuar gjetjet e Komisionit Evropian, duke i cilësuar deklaratat si të pasakta dhe si një paraqitje të deformuar të funksionimit të platformës.
Kompania pretendon se politikat e saj ndalojnë përmbajtjet që promovojnë çrregullime të të ngrënit dhe sjellje të rrezikshme lidhur me peshën. Sipas saj, gjatë 6 muajve të parë të vitit 2026, më shumë se 79 milionë përdorues në Bashkimin Evropian kanë përdorur filtrat për të kufizuar përmbajtjet e padëshiruara.
Hetimi i Komisionit Evropian është pjesë e procedurave të nisura në shkurt të vitit 2024, në kuadër të Ligjit për Shërbimet Digjitale, i cili detyron platformat e mëdha online të marrin masa për të parandaluar rreziqet që lidhen me shërbimet e tyre.
Nëse gjetjet paraprake konfirmohen në përfundim të hetimit, TikTok mund të përballet me një gjobë deri në 6% të xhiros vjetore globale.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.