BRUKSEL – BE miraton raundin e 17-të të sanksioneve ndaj Rusisë

BRUKSEL, 14 maj /ATSH-DPA/- Vendet e Bashkimit Evropian miratuan sot raundin e 17-të të sanksioneve të bllokut ndaj Rusisë, thanë diplomatët e BE-së.

“Sanksionet e reja synojnë të shtrëngojnë më tej masat kundër të ashtuquajturës “flotës hije” të Rusisë”, sipas burimeve.

Anijet, shpesh të pasiguruara dhe me pronësi të paqartë, e ndihmojnë Moskën të shmangë sanksionet perëndimore ndaj çmimeve të naftës. Ato konsiderohen një rrezik për sigurinë dhe mjedisin.

Sipas propozimit, një total prej rreth 200 anijesh do të ndalohen të hyjnë në portet e BE-së. Anijet e sanksionuara gjithashtu nuk janë më në gjendje të përfitojnë nga shërbimet e ofruara nga kompanitë evropiane.

Sanksione personale, të tilla si ndalimet e hyrjes në BE dhe ngrirja e aseteve, parashikohen në më shumë se dhjetëra raste.

Ka plane shtesë për të synuar disa dhjetëra kompani që janë të përfshira në anashkalimin e sanksioneve ndaj Rusisë.

Masat u miratuan nga ambasadorët e BE-së në Bruksel dhe pritet të miratohen zyrtarisht nga ministrat e Jashtëm të BE-së në takimin e tyre, javën e ardhshme.

Po përgatiten masa të mëtejshme ndëshkuese kundër organizatave dhe individëve për përhapjen e lajmeve të rreme dhe shkeljeve të të drejtave të njeriut.

Presidentja e Komisionit Evropian, Ursula von der Leyen mirëpriti sanksionet shtesë.

“Kjo luftë duhet të marrë fund. Ne do ta mbajmë presionin të lartë mbi Kremlinin”, shkroi Von der Leyen në X.

Marrëveshja vjen përpara një takimi të mundshëm midis presidentit ukrainas, Volodymyr Zelensky dhe presidentit rus Vladimir Putin sot në Turqi.

Ukraina, me mbështetjen e aleatëve evropianë, kërkoi gjatë fundjavës që Rusia të binte dakord për një armëpushim 30-ditor. Në përgjigje, Putini propozoi sot negociata të drejtpërdrejta në Turqi.

Zelensky e pranoi sfidën dhe njoftoi planet për të udhëtuar në Ankara, megjithëse Kremlini ende nuk ka konfirmuar nëse Putini do të marrë pjesë. //a.i/