BUKURESHT – Rumania autorizon ushtrinë që të godasë avionët që shkelin hapësirën ajrore pa autorizim

BUKURESHT, 25 shtator /ATSH-DPA/ – Ushtria rumune tani mund të rrëzojë dronët ose avionët ushtarakë me pilot që shkelin hapësirën ajrore të vendit, pas një vendimi të marrë sot nga autoriteti më i lartë i mbrojtjes së vendit.

Më parë, veprime të tilla kërkonin miratim individual nga ministri i Mbrojtjes.

Por, sipas rregullave të reja, komandanti i operacioneve ushtarake mund të marrë vendimin rast pas rasti.

Pavarësisht pamjeve të shpeshta të dronëve rusë në hapësirën ajrore rumune, asnjë nuk është rrëzuar deri më sot, ndryshe nga ajo që ndodhi në Poloni.

Këshilli i Lartë i Mbrojtjes Kombëtare, i kryesuar nga presidenti, përbëhet nga kryeministri, ministri i Mbrojtjes dhe krerët e forcave të armatosura dhe shërbimeve sekrete.

Në korrik, parlamenti rumun miratoi një ligj që lejon rrëzimin e dronëve që shkelin hapësirën ajrore të vendit edhe në kohë paqeje, pa një deklaratë zyrtare lufte.

Për avionët ushtarakë me pilot që hyjnë në hapësirën ajrore rumune pa autorizim, ushtria duhet të njoftojë ekuipazhin para se të ndërhyjë.

Për avionët civilë, ministri i Mbrojtjes ka autoritetin vendimmarrës./   /os/