Babai i Yamal nuk përmbahet: Për sa kohë luan djali im, rivalët të harrojnë majën

Mounir Nasraoui, babai i yllit të Barcelonës, Lamine Yamal, ka tërhequr vëmendjen në rrjetet sociale me një deklaratë për emrin e plotë të djalit të tij, duke sqaruar një detaj që shpesh ngatërrohet nga tifozët e futbollit.

Përmes një videoje të publikuar në rrjetet sociale, Nasraoui theksoi se “Yamal” nuk është mbiemri i futbollistit, por pjesë e emrit të tij të përbërë. Sipas tij, mbiemrat e lojtarit të Barcelonës janë Nasraoui Ebana.

“Lamine Yamal është emër, një emër i përbërë. Yamal nuk është mbiemër. Mbiemrat e tij janë Nasraoui Ebana. Dua që të gjithë ta dinë këtë dhe të mos ngatërrohen”, ishte mesazhi i babait të futbollistit.

Ai shpjegoi gjithashtu se për të, i biri mbetet gjithmonë Lamine Yamal, pavarësisht rrethanave, duke shtuar me humor dhe krenari: “Lamine Yamal, për mirë ose për keq, është djali im”.

Reklamë

Por deklarata e tij nuk përfundoi këtu. Nasraoui e mbylli videon me një mesazh provokues në mbështetje të Barcelonës, duke u shprehur se rivalët nuk do të jenë kurrë në krye për sa kohë që Lamine Yamal është në fushë.

Sqarimi i tij u bë në një moment kur talenti spanjoll ishte sërish protagonist me fanellën e Barcelonës. Në fitoren 6-1 ndaj Deportivo Alavés, Yamal realizoi dy gola dhe kontribuoi me një asist, duke ndihmuar skuadrën katalanase të merrte një tjetër rezultat të rëndësishëm në La Liga.