“Berisha ngre alarmin: ‘I shpallur në kërkim’, por Ergys Agasi shfaqet në SPAK i paprekur”

Ish-kryeministri Sali Berisha ka bërë një deklaratë të fortë, duke pretenduar se gjatë një vizite në ambientet e SPAK ka hasur Ergys Agasin në shoqërinë e drejtueses së Prokurorisë së Posaçme, Irena Dumani, si dhe zyrtarëve të tjerë.

Sipas Berishës, Agasi – i njohur ndryshe si “Gysi” – ndodhej aty në mënyrë të lirë, ndërsa, sipas tij, shprehej i qetë për situatën ligjore. “Gysi festonte se asnjë mandat ndërkombëtar nuk është lëshuar për arrestimin e tij”, deklaroi Berisha.

Ai ngriti dyshime mbi statusin real të Agasit, duke theksuar se ndonëse pretendohet se është në kërkim, lëvizjet e tij tregojnë të kundërtën. “Gysi, gjoja, është në kërkim. Ai në fakt rrugën më të shpeshtë që bën, e bën për në Surrel”, u shpreh Berisha.

Në vijim, lideri i opozitës përdori ironi për situatën, duke shtuar: “Po ta quajmë Surrelin një republikë tjetër, atëherë mund të themi kështu, por ai është një vizitor i shpeshtë i Surrelit”.

Deklarata e Berishës vjen në një klimë të tensionuar politike dhe pritet të sjellë reagime nga institucionet e drejtësisë, veçanërisht nga SPAK, lidhur me akuzat dhe pretendimet e ngritura.