Dogji një sipërfaqe toke dhe pemë ulliri në fshatin Fatishë, nën hetim 72-vjeçari

TIRANË, 4 gusht /ATSH/ Një 72-vjeçar është proceduar penalisht nga policia e Peqinit pasi dogji një sipërfaqe toke dhe disa pemë ulliri në fshatin Fatishë.

Policia njoftoi sot se “si rezultat i veprimeve hetimore për dokumentimin e autorësisë së rasteve të zjarrvënieve, specialistët për Hetimin e Krimeve të Komisariatit të Policisë Peqin referuan materialet në Prokurori, ku nisi procedimi penal për shtetasin P. H., 72 vjeç, banues në fshatin Fatishë”.

“Nga hetimet dyshohet se ky shtetas ka ndezur zjarr në fshatin ku banonte, për të djegur mbeturina dhe si pasojë e përhapjes së flakëve, janë djegur një sipërfaqe toke me barishte dhe disa pemë ulliri”, njoftoi policia.

Materialet procedurale iu referuan Prokurorisë pranë Gjykatës së Shkallës së Parë e Juridiksionit të Përgjithshëm Elbasan, për veprime të mëtejshme.

/m.q/j.p/