FOKUS – Vendet evropiane nisin fluturimet e para të evakuimit nga Lindja e Mesme
MADRID, 3 mars /ATSH-DPA/- Disa vende po organizojnë fluturimet e para të evakuimit për qytetarët e tyre pas përshkallëzimit të luftës në Lindjen e Mesme.
Ministri i Jashtëm i Spanjës, José Manuel Albares tha sot se 175 shtetas spanjollë janë nisur nga Abu Dabi me një fluturim të planifikuar dhe janë drejt rrugës për në Madrid.
Operacionet e riatdhesimit u shkaktuan nga bombardimi i Iranit nga SHBA-ja dhe Izraeli, i cili ka vazhduar që nga e shtuna.
Teherani iu përgjigj sulmeve duke nisur sulme ndaj Izraelit dhe shteteve të Gjirit. Aviacioni komercial është kryesisht i pezulluar në pjesën më të madhe të rajonit.
Sipas vlerësimeve të autoriteteve në Madrid, rreth 30 000 shtetas spanjollë ndodhen aktualisht në rajonin e konfliktit.
Fluturime të mëtejshme janë planifikuar për të përshpejtuar nisjet, veçanërisht nga Emiratet e Bashkuara Arabe. Rreth 13 000 shtetas spanjollë jetonin atje.
Albares e përshkroi situatën në Iran si “më të vështirën”, me më shumë se 150 qytetarë spanjollë ende në vend.
“Qeveria britanike po organizon gjithashtu një fluturim çarter për t’u nisur nga Muskati në Oman në ditët në vijim”, njoftoi sot sekretarja e Jashtme Yvette Cooper, në Parlament.
Cooper tha se 130 000 shtetas britanikë në Lindjen e Mesme ishin regjistruar tashmë në Ministrinë e Jashtme deri sot në mëngjes.
Kryeministri polak Donald Tusk tha se vendi i tij po përgatiste gjithashtu një operacion evakuimi për qytetarët polakë në rajon.
“Ai kishte dhënë udhëzime që fluturimet me avionë qeveritarë do të anuloheshin në mënyrë që aeroplanët të ishin gati nëse do të krijohej mundësia”, tha Tusk.
Ai tha se aktualisht janë rreth 14 000 shtetas polakë në Emiratet e Bashkuara Arabe. //a.i/