Fest 64, anëtarja e jurisë Anila Basha: Sot është një mbrëmje festive, por edhe sfiduese për ne, me përzgjedhjen e 5 debutuesve për natën finale

Gazetarja Anila Basha, anëtare e jurisë së Festivalit të 64 të Këngës, ka treguar për sfidat dhe emocionet që do të sjellë Nata Nostalgjike.

Gjatë një interviste për “Tema e Ditës” në RTSH, znj.Basha tha se pas dy netësh të festivalit të fokusuara tek tekstet e këngëve, melodia, performanca dhe çdo detaji tjetër në skenë, juria do të zgjedh mbrëmjen e sotme 5 debutantët që do të konkurrojnë në natën finale.

“Sot është një natë speciale, ku pas dy netësh kemi qenë të përqendruar për të vlerësuar çdo detaj: tekstin, melodinë, muzikën, performancën dhe gjithçka tjetër në skenë. Sot jemi në një pikë ku do të zgjedhim 5 debutantët që kalojnë në finale. Për mua ishte një sfidë e vështirë, pavarësisht se brenda jurisë kemi ndarë disa role, duke pasur një përfshirje të plotë të fushave. Ne të gjithë plotësuam atë që na duhej për të zgjedhur më mirë 5 debutantët që do të garojnë në natën finale dhe në fund për çmimin e madh”, tha Basha.

Ajo vlerësoi edhe moderatorët e Festivalit të Këngës, Salsano Rrapi dhe Arilena Ara, ku sipas saj ishin dyshja më simpatike.

“Performancat e Salsano Rrapit dhe Arilena Arës ishin të jashtëzakonshme në skenë. Salsano ishte “sheqeri” i skenës me humorin e tij karakteristik, ndërsa Arilena surprizoi duke u bashkuar në mënyrë fantastike me orkestrën dhe skenografinë e RTSH-së, duke e bërë një zgjedhje shumë të mirë për natën. Skenografia ishte e jashtëzakonshme, dhe mënyra se si ishte vendosur orkestra e RTSH-së e bëri festivalin akoma më mbresëlënës”, tha ajo.

/rtsh.al/