GAZA – 20 të vdekur gjatë trazirave në një pikë shpërndarjeje ndihmash

TEL AVIV, 16 korrik /ATSH-DPA/ – Njëzet persona humbën jetën sot në mëngjes gjatë trazirave në një pikë shpërndarjeje ndihmash në Rripin e Gazës, sipas Fondacionit Humanitar të Gazës (GHF) të mbështetur nga SHBA-ja  dhe Izraeli.

Në një deklaratë, fondacioni privat tha se 19 nga viktimat u shkelën për vdekje, ndërsa një person u godit me thikë.

“Kemi arsye të besueshme për të besuar se elementë brenda turmës, të armatosur dhe të lidhur me Hamasin, nxitën qëllimisht trazirat”, deklaroi GHF, duke thënë se incidenti ndodhi në një qendër shpërndarjeje në qytetin jugor të Khan Younis.

Personeli i GHF pretendoi se pa armë zjarri midis të mbledhurve në pikën e shpërndarjes së ndihmave, me një anëtar të stafit amerikan të kërcënuar me armë nga një individ në turmë.

Ky version i ngjarjes  nuk është verifikuar në mënyrë të pavarur dhe organizata islamike palestineze Hamas nuk ka lëshuar një koment.

GHF-ja, e cila filloi të vepronte në fund të majit me mbështetjen e Izraelit dhe Shteteve të Bashkuara të Amerikës, aktualisht po mbikëqyr shpërndarjen e ushqimit në Rripin e Gazës pas muajsh kufizimesh izraelite në shpërndarjen e ndihmave./  /Ad.Ab./