GJKKO rrëzon kërkesën e Lefter Kokës për përfundimin e afateve të paraburgimit
TIRANË, 24 tetor /ATSH/ Gjykata e Posaçme e Shkallës së Parë për Korrupsionin dhe Krimin e Organizuar rrëzoi kërkesën e ish-ministrit të Mjedisit Lefter Koka për lirimin nga burgu.
Vendimi u mor sot nga gjyqtari Erjon Bani, i cili rrëzoi kërkesën e Kokës për shuarje të masës së sigurisë, me pretendimin se ka kaluar afati 3-vjeçar i paraburgimit për inceneratorin e Fierit.
Kundër këtij vendimi mund të bëhet ankim në Gjykatën e Posaҫme të Apelit për Korrupsionin dhe Krimin e Organizuar brenda pesë ditëve, duke filluar ky afat nga e nesërmja e njoftimit të këtij vendimi.
Koka u arrestua në dhjetor të vitit 2021 për aferën e inceneratorit të Elbasanit, nën akuzat për shpërdorim detyre, pastrim parash dhe korrupsion. Në vitin 2023 ai u dënua me 5 vite e 8 muaj burg, por në korrik 2025 Gjykata e Durrësit i njohu të drejtën e lirimit me kusht.
Në lidhje me inceneratorin e Fierit, Koka u dënua më 23 shtator 2023 me 10 vite burg, por në dhjetor 2024 Apeli i GJKKO vendosi që dosja të rikthehet për rigjykim në shkallën e parë. Më 21 tetor 2025, Gjykata e Lartë vendosi që kjo çështje të shqyrtohet nga Apeli i GJKKO.
Ndërkohë, për çështjen e inceneratorit të Tiranës, më 16 prill 2025, ai u dënua me 3 vite burg nga GJKKO, një vit më pak se kërkesa e Prokurorisë së Posaçme, por ky vendim ende nuk ka marrë formë të prerë.
/m.q/j.p/r.e/