Gjykata Administrative shfuqizon masat disiplinore për përjashtimin nga Kuvendi të disa deputetëve të PD-së

TIRANË, 17 prill/ATSH/ Gjykata Administrative e Shkallës së Parë Tiranë vendosi sot shfuqizimin e masave disiplinore “Përjashtim nga pjesëmarrja në komisione dhe seancë plenare” për 30 ditë për deputetët Flamur Noka, Albana Vokshi, Elda Hoti, Belind Këlliçi, Klevis Balliu dhe Fidel Kreka.

Këshilltari ligjor i Partisë Demokratike, Marash Logu në një postim në rrjetet sociale informoi se “masat disiplinore lidheshin me seancën plenare të datës 18 dhjetor 2025, ndërsa vendimet e shfuqizuara nga Gjykata ishin marrë në datën 23 dhjetor 2025 nga Sekretariati për Etikën, dhe lënë në fuqi në datën 20 janar 2026 nga Byroja e Kuvendit”.

Sipas Logut, pas vendimit të Gjykatës Administrative të Shkallës së Parë Tiranë, ky është rasti i dytë që Gjykata vendos shfuqizimin e masave disiplinore ndaj deputetëve të opozitës për shkak se janë marrë në kundërshtim flagrant me ligjin.

/k.s/a.f/