Gjykata cakton masat për 7 të miturit e ndaluar në protestën e 10 shkurtit të PD-së

Gjykata ka dhënë sot vendimin për masat e sigurisë ndaj 7 të miturve të cilët u ndaluan nga forcat e rendit gjatë tensioneve në protestën e organizuar më 10 shkurt.

Për të gjithë të miturit e përfshirë në proces, trupi gjykues ka caktuar masën e sigurisë “Detyrim paraqitjeje”. Sipas vendimit, ata janë të detyruar të paraqiten pranë autoriteteve policore një herë në muaj deri në përfundim të hetimeve të plota mbi ngjarjen.

Tensionet dhe përplasjet në tubim

Protesta e 10 shkurtit, e cila nisi si një tubim paqësor, u përshkallëzua shpejt në përplasje të dhunshme mes protestuesve dhe forcave të rendit. Situata u rëndua kur grupe tubuesish hodhën lëndë djegëse (molotov) dhe sende të forta drejt kordonit të policisë.

Forcat e Ndërhyrjes së Shpejtë u përgjigjën me përdorimin e ujit me presion dhe gazit lotsjellës për të shpërndarë turmën.

Hetimet po vijojnë për të identifikuar personat e tjerë që mund të kenë nxitur veprimet e dhunshme. Aktualisht, situata mbetet nën monitorim, ndërkohë që pritet të shqyrtohen edhe provat filmike nga kamerat e sigurisë.

/rtsh.al/